Li Amedê Ji Bo Şêx Seî’d Beyanat

Li Amedê di “Merkeza Rojnamevanên Rojhilat” de li ser zulmên rejima Tirkî û neheqiyên li ser Şêx Se’îd û hevalên wî de beyanata neşriyatê hat li darxistin. Beyenat li ser navê ‘Ebdûlîllah Firatê neviyê Şêx Seî’d Efendî û parêzer Sidqi Zîlan hat kirin. Di beyanatê de wiha hat gotin:

“Sebebên serhildana xelqê Kurd ku di 1925an de ji Pîran dest pê kirye ev in: Zîhniyeta rejîma wê dewrê, ji xelq û Îslamê re ğerîb bûye û jê dûrketiye. Xelqê Kurdistanê bi tenê hiştiye û li ser gelê Kurd, polîtîka înkarê xistiye îcraatê.

Ji ber vê yekê Şêx Seî’d û hevalên wî, mes’ûliyeta xwe ya Îslamî û însanî ji bîr nekirne; ji înkara heqên gelê Kurdistanê re, ji dijminantiya zîhniyeta rejîmê ya li ber Îslama dînê milletê Tirk û Kurd û milletên dinê re nebûne temaşevan û ji heqên meşrûyê gelên Kurdistan û Enadolê re bûne tercuman.”

Her wiha di beyenatê de zulm, qetlî’am, nefî û te’deyên din ku li ser xelqê Kurd hatine rast kirin weke Dêrsim û Zîlan û heta cesedên di bin erdê de veşartî jî, hat gotin.

Dîsa hat beyan kirin ku cîhê Şêx Seî’d û hevalên wî tê de hatine veşartin eşkere ye. Divê bên derxistin. Lewra Şêx Seî’d Efendî, şexsiyetek Îslamî ye, mezinê terîqetê ye, ‘alim û rêberek gelê Kurdistanê ye. Em dixwazin qîmeta wanî li ba Xweda û xelqê, li wan bê vegerandin. Ji bo vê jî em ji xelqê Kurdistan û Tirkî destek dixwazin. (Ferman Çiyayî / Bangaheq)