Li zanîngehê dersa tefsîra Kurdî dibînin
Xwendevanên zanîngehê di bergeha qursa ku li Zanîngeha Mûşê hatiye vekirin de dersa tefsîra Kurdî dibînin.
Mamosteyên Beşa Wêje û Zimanê Kurdî yên Zanîngeha Mûş Alparslanê bi “Koma Xwendevanên ku Li ser Xêrê Kom Dibin”( Hayırda Buluşanlar Öğrenci Topluluğu) re hevkarî kirin û bo xwendevanên zanîngehê qursa tefsîra Kurdî vekirin.
Di qursa ku li kulliyeya zanîngehê hat vekirin de di nava heftiyekê de seatek dersa tefsîra Kurdî tê dayîn û xwendekarên zanîngehê jî ji qursê re eleqe nîşan didin.
Îkram Fîlîzê ku Wezîfedarê Hîndekariyê yê Beşa Edebiyat û Zimanê Kurdî ye derbarê mijarê de diyar kir ji ber ku exlebeyê xwendekarên ku li zanîngehê perwerdehiyê dibînin Kurd in, ew qurseke wisa vekirine û ew ê xwendekar bi zimanê xwe dînê xwe çêtir fêm bikin.
Fîlîz di berdewama axavtina xwe de diyar kir xwendekarên ku hatine zanîngehê ji Mûşê û derdora Mûşê ne û dû re wiha li axavtina xwe zêde kir: “Ji ber ku xwendevanên me ji heremê ne, me wek mamosteyên Beşa Edebiyat û Zimanê Kurdî qerar da bo van xwendevanan qursan vebikin. Hinek mamosteyên me qursa Farisî, hinek ya Erebî û Ingilizî û hinek jî ya Kurdî vekirin. Me jî di nav xwe de îstîşare kir da ku em dersa tefsîra Kurdî bidin temamê xwendevanên zanîngehê. Ji ber vê yekê me digel hevalên xwe û “Koma Xwendevanên ku Li ser Xêrê Kom Dibin” qerar da ku em dersa Kurdî vekin.
“Xwendevan ji qursan îstîfade dikin”
Fîlîz di berdewama axavtina xwe de diyar kir wan di destpêkê de rasterast dest bi tefsîrê nekirine, ji dêla vê yekê de li ser sedemên nuzûlê sekinîne. Fîlîz dû re wiha li axavtina xwe zêde kir: “ Xwendekar ji vê qursa me sûdê werdigrin. Heta îro qursên tefsîra Kurdî nehatin vekirin û di vî warî de konferans nehatin tertîpkirin. Me tiştekî wisa nedîtibû. Me jî ji bo ku ev yek bibe destpêk îro dest bi dersa xwe ya ewil kir. Exlebeyê xwendevanên zanîngeha me Kurd in. Ji ber vê yekê me biryara vekirina qursa tefsîra Kurdî da. Me vekir da ku xwendekar dînê xwe bi zimanê xwe hîn bibin. Lewra ger bi zimanê xwe hîn bibin û binivîsînin ew ê ev yek bo wan baştir bibe. Xwendekar ji ber ku Kurd in ew ê çêtir fêm bikin û ew ê ilmê xwe ya tefsîrê zêdetir bikin.”
Xatîp Erdoğmuşê ku li zanîngehê Wezîfedarê Hindekariyê ye û şewirmendê akademîk ê koma xwendevanan e, derbarê mijarê de diyar kir Kurd dîndar in û divê ciwan bi tefsîrê hemhal bibin.
“Ev qurs bo hemû kesên ku dixwazin Kurdî hîn bibin vekiriye”
Erdoğmuş di berdewama axavtina xwe de diyar kir ev qurs bo hemû kesên ku dixwazin Kurdî hîn bibin vekiriye û dû re wiha li axavtina xwe zêde kir: “ Ji ber ku em li vê derê dijîn û ji ber ku exlebeyê xwendekarên me Kurd in em xwest bo wan tiştekî bikin. Ji ber vê yekê me dersên pratîk ên Kurdî vekir. Ev qurs bo hemû kesên ku dixwazin Kurdî hîn bibin vekiriye. Digel vê yekê me dersên tefsîra Kurdî jî vekir. Em Kurd însanên dîndar in. Me ji xortên xwe xwest ku bi tefsîrê mijûl bibin. Îro me dest pê kir û dersa ewil ji teref Mamoste Îkram Fîlîz ve hat kirin. Ji ber ku xwendekar bi vê meselê eledar bûn em kêfxweş bûn.”
“Em bi saya vê dersê dînê xwe bi zimanê xwe hîn dibin”
Xwendekarê bi navê Sîdar Gokê ku beşdarî qursê bû derbarê mijarê de hest û ramanên xwe wiha anî zimên: “ Em li vê derê dersa tefsîra Qur’anê dibînin. Ew tefsîrên ku heta îro hatine nivîsîn ji teref mamosteyê me ve tên nasandin. Ew xeletiyên nivîsê û watê yên ku di tefsîran de hene mamosteyê me nîşanî me dide. Em li vê derê van tiştan dibînin. Mamosteyê me wan qisseyên ku di Qur’anê de derbas dibin wergera wan bi Kurdî dike û tefsîra wan ji me re dike. Em bi saya vê dersê dînê xwe bi zimanê xwe hîn dibin. Ew ilma ku em wê bi zimanê xwe tehsîl dikin çêtir di serê me de cîh digre.”(ÎLKHA)
